Aumenatge a Pèire Boissièra

Pierre_Boissière 2.jpg

Lo Pèire se n’anè. Militant e responsable de l’IEO 47 pendent annadas, Pèire Boissièra estó un element centrau de l’occitanisme olt-e-garonés, e memòria viva de la cultura deu Naut Agenés . Participè pendent annadas a l’Escòla Occitana d’Estiu, on non solament animava talhèrs de canta, de toponimia, de fabricacion de joguetons de husta, mes tanben n’estó lo president.
 
Sa votz èra plan coneguda pr’amor de sas intervencions quotidianas sus Ràdio 4 Cantons on presentava metèo e toponimia. Estó tanben referent de toponimia occitana peu conselh departamentau.
 
Dab Marie-Odile Dumeaux presentè espectacles de contes de collectatges tant dens las classas com dens las EHPAD.
 
Prenó part a la Quinzena Occitana, manifestacion culturau de las associacions occitanas en balhar talhèrs de lenga aus escolans d’Òlt e Garona.
 
Engenhaire en agronomia, e plan sensibilizat a la biodiversitat, participè a mei d’ua publicacion botanica deu parçan. Mes èra tanben cantaire, contaire e etnograf. Remembraram particularament lo libe qu’escrivó en 2008, Del temps del Marçalet, a partir de sons collectages per reviscolar la memòria deus musicaires dens los vilatges.
 
Son implicacion per la revitalizacion de la lenga estó tanben politica e estó cònsol de la Cauçada (Naut Agenés), son vilatge; après aver militat a Viure au País, au Partit Occitan, se presentè a las eleccions cantonalas e regionalas per deféner l’occitan.
 
Exigent dens sa practica artistica, ne deishè pas de desvolopar ua estetica vocau excepcionau que poirem escotar enqüèra sus sons discs, com dens son CD de Cap Negre Passat Deman.
 
Maria-Anna Châteaureynaud

Publicité
Suggestion d'articles
Suggestion d'articles