OCCITANIE

A PREPAUS DEU NOM DE LA REGION  (2).jpg

A PREPAUS DEU NOM DE LA REGION 

A PREPAUS DEU NOM DE LA REGION 

 

Le burèu deu Conselh Economic, Sociau e Environamentau Regionau (CESER) a causit un nom que hasca consensus dambe los dus precedents : "Lengadòc-Pirenèus" ; "Lengadòc" entà "Lengadòc-Rosselhon" e "Pirenèus" entà "Miejorn-Pirenèus".

Pr'aquò, maugrat que sondatges pas oficiaus e iniciativas divèrsas hascan paréisher que les ciutadans de la region son en majoritat favorables a "Occitània", le CESER ei paradoxalament desfavorable au hèit que "Occitània" sia dins le nom...

Le paradòxe qu'ei pas solament dins la negacion de çò que sembla èster ua volontat populara, mès tan plan dins le hèit que "Lengadòc" e "Occitània" t'an la medisha significacion prumèra : "Lengadòc" ei ua simplificacion de "País de lenga d'òc", que le sinonime ei... "Occitània" ! la nuança actuala ei que le Lengadòc evòca puslèu le sens redusit deu sud de l'Occitània francesa de l'après Crotzada dels Albigeses, sia tot just l'ancian Comtat de Tolosa.

Alavetz, le CESER qu'ei desfavorable a çò que "Occitània", qu'a un sens pro larg, sia dins le nom de la region, mais qu'ei pr'aquò favorable au hèit que son quasi-sinonime Mondin-centrista "Lengadòc" i posca figurar ? estranh...

Mejam, ensajem d'i véder clar.

Prumèr : le CESER nòta que "les sondatges realizats peus medias regionaus botan "Occitània" en cap" e reconeish que "las pecetas de presença e la medalhas hargadas peus Estats deu Lengadòc portavan le mot "Occitània" dincas a la loa desaparicion en 1789 e que la lenga d'Òc t'èra parlada dins le sud sançèr de França..."

Notatz que l'emplèc deu passat "èra parlada" mòstra de prumèr ua manca de respècte cap aus qui parlan enqüèra la lenga (jo prumèr, l'emplegui quitamant cada dia), sia, piri, de l'ignorància d'aqueste hèit ; les sòcis deu CESER, que son supausats èster menaires, monde cultivats e competents, semblan pas saber que i a enqüèra dins la region loa locutors de la lenga d'òc ("patoès" o gascon, rai coma l'aperatz). Mesprès o manca de coneishença ? quau que sia, nos podèm questionar.

Segond : le CESER t'explica que "Occitània" ei d'enebir per'mor que, com'ac dísen les occitanistas eres-medishes, Aquitània, Provença o Auvèrnha se poderián sentir panats (?)

Plan solide, le CESER t'esvita plan de pensar a d'eventuaus noms de compromés coma "Occitània Pirenèus", "Occitània Centrala" o perqué pas "Occitània Rosselhon", "Occitània Catalonha" etc. ! le CESER bota sonque le dit sus l'argument que t'escana lo mot "Occitània".

Entà caricaturar, le CESER nos ditz que "Lengadòc Pirenèus", aquò ei bon, mès que son quasi-sinonime "Occtània-Pirenèus", seriá pas bon, per'mor qu'aquò poderiá enrabiar les Auvernhats (?). Chò, de sigur !

Vos citi :

"L'apropriacion d'aqueste nom "Occitània" per la sola region nòsta, aquò's poderiá èster interpretat coma ua manca peus autes parçans qui's reconeishen de son airal d'influença"

Tresau, le CESER nos hè comprénguer que les regionalistas t'an faussat les sondatges.

Podèm ça'm par hèr remarcar qu'ei coérent, evident mèma que les regionalistas se sentiscan concernits per un sicut que toca a la region (region > regionalistas) ! le ciutadan de basa, eth, se mobilisarà puslèu per un sicut pertocant au porta-moneda.

Qu'ei tan simple qu'aquò : se "Occitània", "Lengadòc" e "Catalonha" son gessits deus sondatges, qu'ei tot simplament per'mor que les qui s'interessan au debat suu nom de la region loa, son les que s'interessan a LA LOA region, es-a-díser... les regionalistas. Logic.

38-occitanie_1379427365.gif
38-occitanie_1379427365.gif
manif-Tolosa-31 de març de 2012 (2).jpg
manif-Tolosa-31 de març de 2012 (2).jpg
Publicité
Suggestion d'articles
Suggestion d'articles