Quin serà lo nom novèl de la region nòsta ?
Coma ac sabètz, dempus lo prumèr de genèr passat, las duas regions administrativas francesas ditas "Languedoc-Roussillon" e "Midi-Pyrénées" son maridadas.
D'un punt de vist geografic, qu'ei ua region de prumèr Guianesa* (30 del cent), en seguida Gascona (29 del cent), Lengadociana (28 del cent), Catalana (6 del cent), Provençala (4 del cent) e tan plan ua brica Auvernhata** (3 del cent).
Pr'aquò d'un punt de vist demografic, culturau e politic, qu'ei clarament Lengadociana per'mor de las duas capitalas, Montpelhièr e Tolosa, e aquò explica benlèu un vam de mantuns entau nom "Lengadòc" o "Lengadòc-[quauqu'arren]" coma nom a venir de la region. Aute vam, lo deus Catalans, que solide se vòn pas trobar negats dins ua region a 94 del cent Occitana (los Catalans que desbremban benlèu ua brica que la soca mème de la lenga Catalana... qu'ei l'Occitana !).
Lengadociana, aquesta region l'ei tanben d'un punt de vist istoric, per'mor que la Guiana Orientala (Carcin, Roèrgue), jos l'influéncia mondina deTolosa, se ditz tan plan "Lengadòc Naut"... Pr'aquò, lo Lengadòc istoric e politic (Guiana "Lengadòc Naut" e Lengadòc Baish) ara qu'ei espandit a ua brava part de Gasconha entà hèr aquesta region novèla : atau, Comenges, Bigòrra, Gasconha Tolosana, Savés, Coserans, Armanhac e Lomanha se viran de mès en mès cap a la Mediterranea.
Tot aquò pòt servir de basa entà la causida d'un nom judicios.
De sigur, un nom trop longàs qu'ei d'evitar [Guiana-Gasconha-Lengadòc-Catalonha], autan coma un acronima tròp brac e chic evocator (LRMP). Nos demòra doncas que de soscar a un nom coerent que sia respectuos de las identitats de cadun... Tròbi que "Occitania" o "Occitània-[quauqu'arren]" va dins aquesta dralha... Mès alavetz, de véder coma i càber l'identitat Catalana minoritària dihens (?).
Enfin, mès simplament, sense copa-cap, d'autes la disen simplament "Francesa" aquesta region, e se contentarián d'un nom "proviciau" o geografic coma "Midi", "Sud de France" o "Pyrénées-Méditerranée"...
De tot biais, la presidenta novèla de la region, Na. Caròla Delga, a promés d'adobar ua "consulta ciutadana" en linha suu malhum aus estatjans, que lo resultat d'aquesta consulta serà en seguida somesa a l'aprobacion deu Conselh d'Estat a París. Chò, que de tot biais, lo nom serà decidat "en haut", mès alavetz poderam jutjar deu respecte de la volontat populara peus que nos govèrnan : es que valideràn lo nom causit peu pòple, o es que, de tot biais, nos l'impausaràn ? vam véder !
---------------------------------------------
