Coma cada annada al començament de julhet s’es debanat amb grand succès lo festenal Escota e Minja a l’Isla de Baish (Savés). La vila, una de las mai sensiblas a la cultura occitana, s’es consagrada a la cultura del país durant quatre jorns amb una participacion especiala de las escòlas, que prepausan de corses d’occitan. Le Journal du Gers ne publica un bèl rapòrt.
Dins lo vast programa cultural e gastronomic del festenal gascon, cal soslinhar lo concèrt de clausura del grop de las Valadas Saber Système, que amb son jove cantaire ben engatjat dins l’occitanisme, faguèron bolegar lo mond, coma o podètz veire dins lo vidèo que seguís:
De notar que Saber Système avián participat en abril passat a Coni a l’escambi dels 53 joves qu’estúdian occitan als licèus de de l’Isla de Baish (Savés), Sent Gaudenç (Comenge) e Vielha (Val d’Aran) e de las Valadas, en ne fasent quitament un vidèo.
Escota e minja es un festenal que cèrca de “hèr víver l’espaci public e menar las gents deu canton sus las plaças de la vila”, çò explicava a Jornalet Vincenç Ribièra, president del festenal lislés. “En Occitània, e particularament a L’Isla de Baish, çò sembla, l’occitan es una part importanta de la cultura, mès es pas brica exclusiva. La programacion mescla grops occitans damb grops d’en pertot. Pensi qu’avèm capitat, mercés a un deus creators, René Ortega, d’implicar fòrça associacions, estanquets, mès tanben entrepresas”
COMENTARIS
L'Isla de Baish es l'exemple d'ua vita associativa occitanista activa, dambe relais politics ancians e ua aufèrta generala de l'occitan a l'ensenhament. Ua pròva que i a pas d'occitanisme culturau sense d'occitanisme politic.
