.jpg)
Cinc liceans seràn entenuts doman a mièijorn a l’Assemblada Nacionala francesa dins lo grop “Lengas e culturas regionalas”. A la medisha ora, i aurà ua amassada sus la plaça parisenca d’Édouard Herriot, davant la bastissa parlamentària, que s’i mobilizaràn especialament de joens d’Occitània, de Corsega, d’Alsàcia, de Bretanha e deu Bascoat. L’amassada segueish la crida deu collectiu Per que Viscan Nòstras Lengas (PQVNL) qu’es plan chepicós deus mejans insufisents afectats a l’ensenhament en aqueras lengas e d’aqueras lengas, a maugrat l'adopcion en abriu de 2021 de la lei de proteccion e promocion de las lengas minorizadas, coneguda coma Lei Molac.
Los manifestants volón reclamar ua evolucion de l'article 2 de la Constitucion francesa, que consacra a l’ora d’ara lo francés coma sola lenga de la Republica, per obténguer un estatut oficial per las autas lengas autoctònas. Dins aqueth sens, PQVNL se muisha preocupat peus dus articles de la lei que los censurèt lo Conselh Constitucional. Concretament, los magistrats considerèn anticonstitucional l’article 4, qu’oficializa la possibilitat d’ensenhament immersiu de las lengas territorialas, e l’article 9, qu’autorizava que de prenoms ajan de signes grafics qu'existeishan pas en francés, coma la “ñ” deu breton e los accents pròpris de l’occitan.
Lo collectiu remembra que l’article 2 de la Constitucion estèc adoptat per lutar contra l’anglicizacion creishenta (Lei Toubon) mes qu’a l’ora d’ara serveish pas que per reprimir l’usatge de las lengas ditas regionalas.
Mercés au Jornalet
