.jpg)
Escòla: mapa mentala de “L’occitan, qu’es aquò?”
Los escolans de Sant Antonin an resumit las coneissenças aqueridas dins un cors ludic de descobèrta de la lenga e de la cultura occitanas
Amb l’objectiu de far descobrir la lenga e la cultura occitanas, los collegians de 6a a la 3a del collègi Pèire Bayrou de Sant Antonin (Causse de Cailutz) an recebut un cors ludic per la professora Linda De Lorenzo.
La tòca primièra es donc de sensibilizar e d’iniciar los escolans a la lenga e la cultura occitanas que los enròdan. “A aquela escasença, ai creat un ensemble de jòcs que mòstra la preséncia de la lenga dins nòstre usatge del francés e nòstre environament, e la facilitat de l’aprene gràcias al sistèma de palancas romanicas”, çò explica De Lorenzo.
Dins l’encastre del projècte final, los escolans an resumit lors coneissenças dins una mapa mentala entitolada “L’occitan, qu’es aquò?”. “Los mai polits trabalhs son publicats dins un blòg qu’ai creat pels escolans e que lo nom es estat causit pels collegians de Negrapelissa, e tanben per far sortir l’occitan de la classa e valorizar lor trabalh. Lors òbras saràn tanben afichadas plan lèu sus las parets del collègi”, çò precisa la professora.
D’autres projèctes son a venir e saràn publicats dins aquel blòg: http://lindade-lorenzo.wixsite.com/lesbarjos
De Lorenzo es professora d’occitan al collègi Pèire Bayrou de Sant Antonin (Causse de Cailutz), al collègi Joan Onorat Fragonard de Negrapelissa (Bas Carcin) e al licèu Claudi Nougaro de Cauçada (Causse de Cailutz).