Menu

Narbona "Occitània, ua fòrça economica"

101_2702.JPG

Joan-Luc Davezac "Lo torisme en Occitània"

                

                    Joan-Pierre Laval  Paîs Nòstre                                                     Joan-Luc Davezac  Bastir Occitania

   

"Occitània, ua fòrça economica"

"Bastir Occitània" estèc invitat entà participar au collòqui "Occitània, ua fòrça economica" adobat lo dissabte dotze de noveme a Narbona (Lengadòc) peu moviment "Païs Nòstre".

Après t'aver hèit ua evocacion braca de l'accion passada suu terren de "Bastir Occitània" (de la campanha de dus-mila-sètze entaus noms "Occitània" / "Occitània - País Catalan" entà la region en passar par l'engatjament a las divèrsas eleccions, municipalas de L'Isla-de-Baish, departamentalas "Liures e Independents" e las quita regionalas dambe Lo Ben Comun), Joan-Luc Davezac qu'ei mès precisament intervengut dins lo capítol "Lo torisme en Occitània" entà evocar un subjècte que coneish de plan : lo torisme dins Gèrs (Armanhac, Astarac, Savés, Fesensaguet, Lomanha e Gasconha Tolosana). 

Joan-Luc Davezac relativisèc l'atrèit deu "Torisme Blu" de Gèrs : evidentament qu'ei pas brica comparable au massiu de la Còsta Lengadociana (evocada dins l'intervencion precedenta). Empatcha pas que la frequentacion deus Lacs de Gondrin e de Tors-Sent-Cric o de la basa de léser de Solomiac ei mès qu'onorablas ! de tot biais, lo Torisme Blu en Gasconha ei luenh d'èster anecdotic ! 

Solide, lo punt fòrt deu torisme Gascon, qu'ei lo torisme vèrd : la frequentacion de las Jasenças e las Crambas d'Òstes, lo tast deus produits regionaus Gascons, aquò que son valors seguras ! La Gasconha qu'ei tan plan rica de sas "vièlhas pèiras", especialament lo departament de Gèrs que's pòt regaudir de sas cranas ciutats medievalas, remirablament conçebudas a l'epoca (las "Bastidas" de Sarrant, Colonha, Montrejau-de-Gèrs), de sos vilatges pintoresques (Larressingla), sens desbrembar l'Abadia de Flaran o las ciutats de Aush e de Lectora, de l'istòria prestigiosa. En parlar d'istòria, qu'ei pas possible de hèr l'androna suu mès celèbre deus Gascons : d'Artanhan ! seriá natiu de Lupiac, pr'aquò d'autes vilatges vesins, que voldrián benlèu eres tanben conéguer une frequentacion toristica comparabla a la de lor famós vesin, contestan aquera ipotèsa o reivindican simplament lo hèit que D'Artanhan i auja tanben viscut... 

          

 

La Gasconha, qu'ei tanben ua tèrra de hèstas, hèiras e hèstejadas : Las bandas de Condòm, la Hèira de la Pentacosta a Vic-de-Fesensac, las hèstejadas "Jazz in Marciac" e "Sam'Africa" a Samatan... La cultura autoctòna Occitana qu'ei tanben plan presenta, dambe entà la musica tradicionala la plan batiada hèstejada Trad'Envie a Pavia e entà la cançon Occitana modèrna lo hèstenau "Escota e Minja" de L'Isla-de-Baish ; sens desbrembat las hestivitats Occitanas / Gasconas mès modestas adobadas capvath lo departament sancèr, de Castèthnau-Barbarens a Mauvesin en passar par Sheishan...

 

Entà acabar, Joan-Luc Davezac expliquèc un còp mès que la tòca du moviment "Bastir Occitània"

Ei justament de servar aqueth patrimòni Gascon que nos hè la renomada, que s'agisca deu patrimòni materiau ou immateriau fin finala : t'evòca a-n'aqueste subjècte lo hèit que lo Conselh Departamentau de Gèrs recentament botèc a disposicion a mantuns Relais d’Assistantas Mairalas, au Centre Regionau deus Regents d'Occitan e la Mediatèca Departamentala un dètzenat de maletas pedagogicas entà pertocar la generacion novèla a la lenga Occitana indigèna.

 

Suggestion d'articles
Commentaires d'articles
Suggestion d'articles