.jpg)
COMUNICAT DE PREMSA
Lo CREO Miègjorn-Pirenèus es mòrt… Visca lo CREO Tolosa !
Un 30at de professors d’occitan de l’acadèmia de Tolosa s’amassèron lo 26.11 e an un fum de projèctes novators.
Simbolicament lo CREO cambièt de nom amb la disparicion de la region Miègjorn-Pirenèus, que foguèt integrada a la region Occitània. Aital, lo CREO Miègjorn-Pirenèus es ara lo CREO Tolosa. Tornam aicí a l’apelacion d’origina volguda per Andriu Lagarda a sa creacion en 1968.
Mai de 30 ensenhaires de lenga occitana faguèron lor assemblada generala (AG) a l’Ostal d’Occitània de Tolosa, dissabte passat, per ensajar de se trobar de ripòstas fàcia a las nombrosas atacas dont patís l’ensenhament de l’occitan. L’AG foguèt lo moment de tornar sus las accions passadas per rapòrt a la refòrma del collègi o encara als afars de las supressions dels Conselhièrs Pedagogics Departamentals del 1èr grad (CPD). Las multiplas letras, rescontres e intervencions del CREO participèron al respècte de l’occitan dins la refòrma del collègi, volguda per Najat Valaud-Belkacem, dins l’acadèmia de Tolosa. Aital, lo CREO-Tolosa constatèt que l’ofèrta de l’ensenhament en òc recuolèt pas dins l’acadèmia tolosana coma se passèt dins la de Montpelhièr. Mas lo CREO Tolosa denóncia çaquelà un arrèst del desvolopament de l’occitan dins lo segondari e que i auja pas mai de creacions de seccions bilinguas (SB) creadas. Ongan, i a pas que tres SB novèlas : Semiac (65), La Vaur (81) e Moissac (82).
Encara mai grèu, assistissèm a la supression dels CPDs d’occitan, coma foguèt lo cas dins l’Òut. La situacion es problematica en Arieja (totjorn pas de CPD, escòla bilingua de Sent Líser tampada), en Nauts-Pirenèus e Tarn. A l’universitat, constatèm una baissa dels efectius a Tolosa.
Segur d’autras accions foguèron menadas coma la collaboracion a la dictada del país tolosan o la participacion al collòqui de la FLAREP de Montpelhièr en octòbre passat. Un facebook del CREO Tolosa foguèt creat, amb un google grop renovelat per facilitat los escambis.
Ajudar los joves collègas
Fàcia a aquestas agressions, lo CREO Tolosa vòl passar a l’accion. Escriurà rapidament una letra al rectorat per demandar lo manten dels CPDs d’occitan. Per butar los joves a s’engatjar sus la via de l’occitan, lo CREO-Tolosa financiarà ajudas als joves collègas per se milhor formar a l’Escòla Occitana d’Estiu de Vilanuèva. Ajudarà tanben estudiants d’occitan de l’acadèmia tolosana a anar presentar los estudis universitaris d’occitan als licèus de l’acadèmia de Tolosa. L’idèa es promòure l’occitan pels joves per permetre qu’aujan mai de candidats als concors dels professors d’occitan. Lo CREO Tolosa contunharà de s’associar a las dictadas occitanas per se popularizar encara mai al prèp de las familhas.
Contactes son preses, o vendràn, amb l’OPLO e lo Conselh departamental de Nauta Garona per permetre al CREO de desvolopar sas accions d’acompanhament dels professors dins lor accion. Se profieitèt del creis de participants a l’AG per feminizar lo burèu qu’èra tot masculin. Ara i son 4 dònas al burèu.
Una delegacion del burèu del CREO Tolosa participarà a l’AG de la FELCO, que recampa tots los CREOs d’Occitània, a Montpelhièr lo 10 decembre que ven.
Composicion del burèu del CREO Tolosa (annada 2016-2017). Novèls al burèu amb un asterisc*
President : Nicolau Rei Bèthvéder
Vice-Presidenta, encargada de la comunicacion per Internet : Cecília Chapduelh*
Clavaire : Bruno Duranton
Los secretaris : Joan-Baptista Courcelle (1 grad), Manu Isopet (2d grad), Joèla Ginestet* (Universitat), Joan Thomàs* (ESPE), Eric Barta (Privat), Laëtitia Gròs* (Encargada de las relacions amb l’EOE).
Los vices secretaris : Olivier Lamarque (1 grad), Virginia Lago* (2d grad, encargada de las relacion amb las familhas), Joan-Francés Courouau* (Universitat).