.jpg)
Comunicat : Bilanç de l'amassada constitutiva de "Bastir Occitània"
Luenh d'èster ua simpla reünion, la dimenjada deu 14 au 16 d'octobre de 2016 estèc entau moviment "Bastir" l'escadença de lançar a L'Isla de Baish (Gasconha Tolosana) l'equivalent d'ua vertadèra amassada constitutiva lo 14, que l'acte fondator simbolic estèc, après l'eleccion deu burèu deu comitat local "Bastir - Gasconha Tolosana", l'adopcion a l'unanimitat de l'abandon simbolic de l'ancian logotipe "Bastir !" entà "Bastir Occitanie".
Gessit deu "manifeste occitanista", lo mouviment "Bastir" serviscoc de prumèr en 2013 entà las eleccions municipalas de 2014. Los militants estacats a servar la loa cultura Occitana millenària te son dintrats en 2013 dins mantunas listas en Occitània sancèra dambe aquesta etiqueta "Bastir" entà portar las loas reivindicacions dins lo debat public.
Atau, en 2014, L'Isla de Baish se hasèva remarcar per la presença a las eleccions municipalas d'ua lista dita "Alternativa" (cap de lista : Jean-Luc Davezac) compausada de sòcis de "Bastir". Dins la ciutat vesia de Sent-Lis, ua auta lista "Alternativa" comprenguèva era tanben sòcis "Bastir". Tan plan, candidats sus Aush estèren etiquetat "Bastir"...
Present en seguida a las eleccions departamentalas, i avoc encartats "Bastir" dins ua còla hèita a-n'aquesta escadença, l'aligança Liures e Independents entà Gasconha (LIG = "Libres et Indépendants pour le Gers" en realitat en version francesa ), còla presenta sus 7 cantons e qui espantèc en depassar las previsions en obténguer un percentatge superior a partits màgers, eres pr'aquò implantats dempuish mantunas decenias.
Lo mouviment "Bastir" estèc un pauc mens visible au moment pr'aquò important de las eleccions regionalas de deceme de 2015, quitament discretament present sur las listas "Lo Ben Comun" deu deputat ecologista Christophe Cavard dins 10 departements d'Occitània.
En seguida d'aquetas eleccions, "Bastir" se mobilisa au moment deu debat sus la causida deu nom de la region Tolosana : logicament, tre lo mes d'abriu de 2016, los militants deu comitat "Bastir - Gasconha Tolosana" t'ocupèran lo terren entà, dambe mès de 20 000 tracts, convéncer los ciutadans de Gasconha Tolosana, Savés, Lomanha... de's mobilisar entà gahar l'escadença de tornar aver un nom istoric e intelligent entà aquesta region : "Occitanie", ou "Occitanie - Pays Catalan". Capitada totala entà aquesta iniciativa istorica !
L'amassada a L'Isla de Baish pendent aquesta dimenjada deu 14 au 16 d'octobre de 2016 estoc alavetz l'escadença de hèr lo bilanç d'aquesta implantacion efectiva jà regionala de "Bastir" pendent los sièis meses passats . Fin finala, la recompença deus esfòrçes de "Bastir Occitània" estèc l'adopcion successiva peu Conselh Regionau, lo gouvern e lo Conselh d'Estat deu nom "Occitanie" entà la region Tolosana. Ei per'mor d'aquò que i avoc lo cambiament de nom : "Bastir !"se sona d'ara enlà "Bastir Occitània".
D'auta part, i avoc un punt sus la venda deus articles de"Bastir Occitània" suus mercats : sengle responsable de comitat (los d'Armanhac-Astarac, de Gasconha Tolosana, de Carcin...) te hasoc un bilanç detalhat de l'activitat e deu nombre deus sòcis novèls.
"No Brexit United Kingdom / Occitania !"
Estèren tanben evocadas divèrses rencontres de "Bastir Occitània" l'estiu passat : ua en seguida d'un convit per Catalans de Barcelona en seteme passat ; ua auta en julhet a Mauvesin (Fesensaguet) dambe convidats Angleses pendent ua serada dita "No Brexit United Kingdom / Occitania !" (sic.), serada mentre la quau estèc plan solide evocat la separacion lèu deu Reiaume-Unit d'Euròpa mès tan plan lo cas interessant d'Escòcia ; aute encontre : lo plan ric dambe l'abat Jòrdi Passerat a la hèsta Occitana de Combarogèr (Lomanha) au mes d'agost.
Pendent aquesta amassada constitutiva, novèlas personas t'an junt la còla. "Bastir Occitània" te recebèva tan plan dus representents du mouviment "En Marcha", venguts especialament de l'auta part de la region (Cevenas). Los dus son sensibles a las ideas defendudas per "Bastir Occitània" e t'an fin finala aderit tan plan au moviment.
"Bastir Occitània", miralh de la volontat populara (45% deus ciutadans consultats t'an plebiscitat lo nom "Occitanie", lo justament defendut suu terren peu mouviment) e de l'expression democratica (las institucions de la Republica Francesa t'an validat aqueth nom), profitèc de la sua accion per gahar la curiositat deus mèdias.
Lo 15, lendoman de l'amassada constitutiva, lo maitin ua taula au mercat de L'Isla de Baish avoc ua brava capitada e balhèc un còp mès l'escadénça a personas novèlas d'aderir au moviment ; l'après-disnada, còlas de soscadissa te tribalhèran suu projècte generau. La serada, "Bastir Occitània" acabèc l'amassada per ua hèsta conviviala que t'i èran convidats totes los amics.
Lo 12 de noveme venent, en seguida deu convit de "Païs Nòstre" au colloque "Occitània, fòrça economica", Jean-Luc Davezac de "Bastir Occitània" evocarà sus l'empont lo sicut deu torisma en Occitània.
La dimenjada deu 19 et 20 de noveme, a l'iniciativa deu comitat locau, "Bastir Occitània" balharà dins las Cevenas, dins la ciutat de Banhòus de Céser, ua conferença de premsa publica (Miegjorn Liure).
