.jpg)
EN SEGUIDA DEU SONDATGE..
En linha suu siti deu Conselh Regionau de Lengadòc-Rosselhon-Miejorn-Pirenèus, lo Comitat deu Nom de la région t'avèva de prumèr causit uèit noms : Occitània, Lengadòc, País d'Òc, Pirenèus-Mediterranea, Tèrra d'Òc, Lengadòc-Pirenèus, Miejorn e Occitània-Rosselhon. Lo Conselh Regionau en comission de las Finanças l'a d'ara enlà redusida a cinq : Occitània, Lengadòc, Pirenèus-Mediterranea, Lengadòc-Pirenèus e... Occitània-País Catalan ! efectivament, estèc jutjat que "País Catalan" èra mès clar que "Rosselhon" entà evocar l'opcion de l'identitat Catalana deus Pirenèus-Orientaus.
"Tèrra d'Òc", "País d'Òc" e "Miejorn" estèren pas retenguts per'mor benlèu que "Tèrra d'Òc" e "País d'Òc" hasèvan desjà pensar a "Occitània" sens n'èster autan popular ("Occitània" demòra tostemps au som de totes los sondatges), e sustot per'mor qu'aquestes noms son desjà depausats (marca de produits cosmetics entà "Tèrra d'Òc" e de vins entà "País d'Òc"). Miejorn estèc benlèu solide jutjat un pauc tròp "provinciau", per pas díser "vielhòt", en mès d'aquò que t'evòca mès dins las memòrias Marselha e la Provença saunejada deu Marcèth Panhòu puslèu que la linha Tolosa-Montpelhièr.
Podèm notar que la proposicion de l'ancian president PS de Miejorn-Pirenèus, sénher Martin Malvi, e tan plan au cap justamen d'aqueste Comitat deu Nom, estèc retenguda : lo son "Pirenèus-Mediterranea" qu'ei ua causida de drauvertura geografica dins la quina cada estatjan d'auèi, de soca o d'adopcion, se pòt sengle reconéguer (la region nòsta qu'ei ua tèrra de mescladís e d'arcuèlh, de "paratge" coma se ditz en lenga nòstra, desempuish lo migrant Espanhòu que't passèc capvath los Pirenèus tre mila-nau-cent-trenta-sièis dincas a l'immigracion tras-mediterranenca de la segoonda mitat dei sècle vint a auèi).
Solide, sens sospresa, la proposicion deus notables deu Conselh Economic Sociau e Environamentau Regionau (CESER), que t'avèva declarat voler "Lengadòc-Pirenèus", estèc tanben retenguda.
Las tres autas proposicions que't demòran son doncas "Occitania" (que per l'ora ei la favorida deus sondatges), "Occitània-País Catalan" (entà agradar aus catalanistas deu Rosselhon) e "Lengadòc" (que demòra quitament tan popular que "Occitània" a Montpelhièr, l'anciana capitala de "Lengadòc-Rosselhon"... Se compreng perqué !).
Quau que sia, lo Conselh Regionau diuriá ne conservar sonque tres en amassada sancèra lo divendres quinze d'abriu.
De seguir...
